: : : ХАМТДАА АЯЛЦГААЯ : : :

Өнөөдрийн байдлаар Монголд 50 гаруй их, дээд сургуульд аялал жуулчлалын чиглэлээр боловсон хүчин бэлтгэх сургалт явагддаг гэсэн судалгаа бий. Эдгээр сургуулиудын харилцаа, хамтын ажиллагаа бага байдаг нь энэ салбар дахь өрсөлдөөний хүч сул байх, тэр хэрээрээ оюутнуудын суралцах, хийж бүтээх идэвхи сонирхол муу байхад нөлөөлдөг юм, тийм учраас 2005 онд МУИС-ийн Орхон аймаг дахь салбар сургуулиас аялал жуулчлалын их, дээд сургуулиудын дунд "Аялал жуулчлалыг хамтдаа хөгжүүлье" сэдэвт аст тэмцээнийг санаачлан, МУИС-тай хамтран анхны тэмцээнээ зохион байгуулсан түүхтэй. Уг тэмцээнд МУИС, МУИС-ийн ОАСС, ХААИС, Орхон ИС, Соёлын ДС, Хангай ДС, Их засаг зэрэг 7 сургууль оролцож, МУИС-ийн ОАСС-ийн баг түрүүлсэн.

2 дахь удаагийн тэмцээнийг 2006 оны 12 сард Их засаг их сургууль, МУИС-ОАСС-тай хамтран зохион байгуулж, нийт 14 сургууль оролцсон нь өмнөх жилийнхээс даруй 2 дахин их тооны оролцогчтой болсон хэрэг юм. Энэ нь бидний зохион байгуулж буй энэхүү үйл ажиллагаа нь уламжлал болохын зэрэгцээ оюутан залуус, багш нарын дунд танилцах, хамтран ажиллах, харилцан суралцах, туршлага мэдлэгээ солилцох ихээхэн хэрэгцээ байгааг илтгэж байгаа бөгөөд уг тэмцээнд МУИС-ийн баг түрүүлсэн байна.

Аялал жуулчлалын их, дээд сургуулиудын дунд гурав дахь жилдээ уламжлал болон зохион байгуулагдсан “Аялал жуулчлалыг хамтдаа хөгжүүлцгээе” мэргэжлийн тэмцээн өнгөрөгч Баасан гаригт Орхон их сургууль дээр амжилттай болж өнгөрлөө.

Тэмцээний ерөнхий зарчмын тухайд нэг сургуулиас оролцох баг нь I - IV ангийн оюутнуудын төлөөлөлтэй /I-р ангиас 1, II-р ангиас 2, III-р ангиас 2, IV-р ангиас 1/ байх ба багууд Аялал жуулчлалын үндэс, Монголын аялал жуулчлал, Монголын газарзүй, Монголын түүх, Аялал жуулчлалын маркетинг ба менежмент, Аялал жуулчлалын эрх зүй зэрэг чиглэлээр асуулт бэлтгэн ирэх даалгавартай. Тэмцээнд багууд хоёр, хоёроороо сугалаагаар тайзнаа гарч, бусад багуудын бэлтгэсэн асуултанд хариулан хамгийн их оноо цуглуулсан баг ялагчаар тодрох ёстой. Гэхдээ тэмцээний үед цуглуулсан онооноос гадна багийн ахлагч нарын тэмцээн их чухал, чухамдаа багийн ахлагч багаа аврах эсэх нь энэ тэмцээнээс л тодрон гардаг юм. 

Энэ удаагийн тэмцээнд МУИС, МУИС-ийн ОАСС, Соёлын дээд сургууль, Орхон ИС, Отгонтэнгэр ИС, Идэр ДС, Хангай ДС, Маргад /Орхон аймгаас ирж оролцсон/, Сэрүүлэг, Соёл эрдэм гэсэн нийт 10 сургууль оролцсоноос Отгон тэнгэр их сургууль тэргүүн байранд шалгарч, МУИС, Идэр дээд сургуулиуд удаах байруудыг эзэллээ.